Në Shën Petersburg, kreu i Departamentit të Financave të Ministrisë së Mbrojtjes së Rusisë, përgjegjëse për Qarkun Ushtarak Perëndimor, Marina Yankina, u gjet e vdekur, shkruan faqja e internetit Fontanka e Shën Petersburgut dhe gazeta Kommersant.
Trupi i 58-vjeçares Yankina u gjet mëngjesin e 15 shkurtit, nën ballkonin e shtëpisë ku ajo jetonte. Në ballkonin e katit të 16-të policia i gjeti dokumentet dhe sendet personale. Siç shkruajnë mediat, hetimi e konsideron vetëvrasjen si versionin kryesor të vdekjes së saj. Zyrtarisht, Komiteti Hetimor nuk është shprehur ende për ngjarjen.
Para se të merrte detyrën në Ministrinë e Mbrojtjes, Marina Yankina punonte në Shërbimin Federal të Taksave dhe ishte gjithashtu nënkryetare e komitetit të marrëdhënieve pronësore të Shën Petersburgut.
Sipas informacioneve nga kanali Mash Telegram, i cituar nga faqja e internetit Meduza, para vdekjes së saj Yankina kishte telefonuar ish-bashkëshortin e saj dhe i kishte kërkuar që të telefononte policinë. Siç pretendon Mash, Yankina “po përjetonte probleme shëndetësore”.
Më 13 shkurt, në një shtëpi fshati në fshatin Golikovë jashtë Moskës, u gjet trupi i ish-zëvendës kreut të drejtorisë kryesore kundër terrorizmit të Ministrisë së Brendshme (e njohur si ‘Qendra E’) e gjeneralit Vladimir Makarov. Pranë kufomës së tij ishte një karabinë Berkut-2M. Makarov besohet se ka kryer vetëvrasje.
